အိမ်မွေးတိရစ္ဆာန်လေးတွေမှာ အဝလွန်ခြင်းဖြစ်ပေါ်နေပြီလား?

ခွေးတွေမှာ အဝလွန်ခြင်းကိုဖြစ်စေတဲ့ အကြောင်းရင်းများ
(၁) အစားအစာများလွန်ကဲစွာကျွေးမွေးခြင်း

စားကြွင်းစားကျန်များနှင့် အဆီများသော အစားအစာများကျွေးခြင်း၊
စားနေကျ အစားအစာများကိုပုံမှန်မကျွေးဘဲ မကြာခဏပြောင်းလဲကျွေးခြင်းဟာ အဝလွန်ခြင်းကို ဖြစ်စေပါတယ်။

(၂) လေ့ကျင့်ခန်းမလုပ်ပေးခြင်း
ခွေးပိုင်ရှင်တွေက အိမ်တွင်းမှာပဲ ဂရုတစိုက်ပြုစုစောင့်ရှောက်ထားပြီး လွဲမှားနေတဲ့ အယူအဆတွေကြောင့် လေ့ကျင့်ခန်းမလုပ်စေခြင်းဟာလည်း အဝလွန်ခြင်းကိုဖြစ်စေပါတယ်။

(၃) အသက်အရွယ်
အသက်ငါးနှစ်ကျော်လာတဲ့ ခွေးတွေဟာ လှုပ်ရှားသွားလာမှုနည်းပါးလာပြီး နေ့စဉ်နဲ့အမျှ calories လောင်ကျွမ်းမှု နည်းပါးလာပါတယ်။
ဒါကြောင့် အဝလွန်ခြင်းတွေကိုဖြစ်စေတတ်တာဟာ အသက်အရွယ်နဲ့လည်း သက်ဆိုင်နေပါတယ်။

(၄) မျိုးရိုးဗီဇ
အချို့သောသားပေါက်လေးတွေမှာ မျိုးရိုးဗီဇကြောင့် အဝလွန်တဲ့ဝေဒနာကို ခံစားနေရပါတယ်။

(၅) ရောဂါများ
လည်မျိုအရှေ့ပိုင်းမှာရှိသော thyroid ဂလင်းမှ thyroid ဟော်မုန်းထုတ်မှု နည်းပါးခြင်းနှင့် pancreas (မုန့်ချိုအိတ်)မှ insulin ဒြပ်လိုအပ်သည်ထက် ပိုထုတ်ခြင်း တို့က ကိုယ်အလေးချိန်တက်ခြင်းကို ဖြစ်စေပါတယ်။

ခွေးလေးတွေမှာဖြစ်တတ်တဲ့ အဝလွန်ခြင်းဆိုင်ရာ လက္ခဏာများ

- ကိုယ်အလေးချိန်တက်ခြင်း
- နံရိုးအိမ်ကိုကောင်းစွာမမြင်ရပဲ အဆီများဖြင့် ဖုံးလွှမ်းနေခြင်း
- အဆီပိုများ များစွာရှိခြင်း
- ဝမ်းဗိုက်ဖောင်းနေခြင်း
- ရွေ့လျားသွားလာမှုနည်းပါခြင်း
- လေးလံထိုင်မှိုင်းခြင်း
- အသက်ရှုခက်ခဲခြင်း
.
အသက်ကြီးလာတဲ့ ခွေးတွေဟာ အရိုးနဲ့ အဆစ်များ နာကျင်မှုကြောင့်သော်လည်းကောင်း၊ လေ့ကျင့်ခန်းလုပ်ရန် အခက်အခဲရှိသောကြောင့်သော်လည်းကောင်း အဝလွန်ခြင်းကို ဖြစ်ပေါ်စေပါတယ်။ ခွေးလေးတွေဟာ အသက်ကြီးလာတာနဲ့အမျှ အစာခြေဖျက်မှု၊ စွန့်ထုတ်မှုတွေ နှေးလာပြီး ကိုယ်အလေးချိန်တိုးခြင်းကိုဖြစ်ပေါ်စေပါတယ်။

အစားအစာများကို ကျန်းမာရေးနဲ့ ညီညွတ်အောင် မစားသုံးခြင်းကလည်း အဝလွန်ခြင်းပိုဖြစ်စေပါတယ်။ calorie မြင့်သော အစားအစာများကျွေးခြင်း တစ်ရက်လျှင် အစားအစာများကို အကြိမ်များစွာကျွေးခြင်းတို့ကလည်း အဝလွန်ခြင်းကို ပိုမိုဖြစ်စေပါတယ်။

ပုံမှန်အားဖြင့် ခွေးလေးတွေ အဝလွန်ခြင်းကို ကိုယ်အလေးချိန်တိုင်းခြင်းနှင့် ကိုယ်အင်္ဂါ အစိတ်အပိုင်းများကို ကြည့်ရှု စစ်ဆေးခြင်းဖြင့် သိနိုင်ပါတယ်။

ကိုယ်အလေးချိန် တိုင်းတာခြင်းနည်းလမ်းများ

နံရိုး၊ ကျောရိုးနဲ့ တင်ပါးဆုံရိုးတို့ကို အဝေးမှ အထင်းသားမြင်နေရပြီဆိုရင် ကိုယ်အလေးချိန် သာမန်အောက်လျော့နည်းနေလို့ပါ။

ခါးဟာ ခန္ဓာကိုယ်အပေါ်ပိုင်းထက်
သေးနေပါက ကိုယ်အလေးချိန်အသင့်အတင့်ဖြစ်ပါတယ်။

ခါးနှင် ခန္ဓာကိုယ်အပေါ်ပိုင်းတို့ အရွယ်အစားကွဲပြားမှုမရှိခြင်းတို့ဟာ ကိုယ်အလေးချိန်သာမန်ထက်များနေလို့ပါ။

ခါးဟာ ခန္ဓာကိုယ်အပေါ်ပိုင်းအရွယ်အစားထက် ကြီးနေခြင်း၊
ဗိုက်ပူ ဗိုက်ကားနေခြင်းတို့ဟာ အဝလွန်နေလို့ပါ။

သင့်ရဲ့ခွေးလေးဟာ ကိုယ်အလေးချိန် သာမန်ထက်များနေခြင်း (သို့မဟုတ်)
အဝလွန်နေခြင်းတို့ဖြစ်နေပါက တိရစ္ဆာန်ကု ဆရာဝန်နှင့်တိုင်ပင်၍
ကိုယ်အလေးချိန်ထိန်းသိမ်းခြင်းပြုလုပ်ပေးသင့်ပါတယ်။
တိရစ္ဆာန်ကုဆရာဝန်ဟာ ကိုယ်အလေးချိန်နှင့် ခန္ဓာကိုယ်အနေအထား အဆင့်သတ်မှတ်ချက်တွေ တိုင်းပေးပါလိမ့်မယ်။